Jesuh cu Bawi A Si (Part 2)

Filipi 2:11; Isa. 45:22-23

Biahmaihi

Hi Baibal cacaang hi Jesuh CV, a si tiah an ti. Bawi timi biafang hi bible vawlei ah cun sullam ngei tein hman a si. Baibal chungah cun Nu le va hmanh kha a nupi nih a va kha ka bawipa tiah a auh tawn. Mibu lak zongah bawi phun le sal phun ti in an um. Siangpahrang pawl an bawi chan a si. Cucaah lei vialte nih Jesuh cu Bawipa a si an ti lai timi biafang hi Jesuh caah a biapi mi Jesuh sining chimtu biafang pakhat a si.

Nihin kan chan tu ah cun hngalh awk le sullam ngeihter awk ah nihin mino ca ahcun a har men lai. Zeicahtiah bawi timi biafang hi nuhrin covo a fiang cangmi hna le a ṭhawnnak hmun hoi ahcun hlan chan bantuk in fian lo a fawi te. Cucaah nihin ah thawngṭha hrawmh kaan duhmi hna cu Jesuh cu Bawi a si timi biafang hi nihin kan chan nangmah le keimah caah zei sullam dah kan ngeihter lai I zeitinin dah Jesuh cu kan nun ah kan bawiter lai timi hi ruat ṭi tuah hna u sih tiah kan sawm hna.

Hi kan chim hlan ah Bawi timi biafang nih zei sullam dah a ngeih timi langhter ka duh. Bawi timi biafang nih cun nawl ngaih nun kha a kan cawnpiak duhmi a si ko. A nun ah Jesuh cu Bawi a si a timi hna cu a nunnak ah Jesuh kha nawl ngeihnak sang bik a pe kho I Jesuh duhning in nun a tim mi hna kha an si ko.

Cucaah nihin kan chan zong ah …

  1. Kan nunnak ah a bawi mi hi a um peng ko. Rian ah kan cung le an um tawn I mah hna duhning in rian a ttuan lengmang mi kan si ko. Hlan chan bantuk in a nih bawi, a nih sal ti cu a um ti lo nain nawl ngaih nun, kan nun a kan hruaitu cu a um peng ko. Cu hruaitu, kan nun a hiptu cu Jesuh, Pathian bia a si tawn maw? Phun dang in cun na nun ah Jesuh cu Bawi a si tiah na ti kho ve maw?
  2. Daniel le a hawi le pathum, Shadarek, Meshak, le Abednego hna nunnak kan zoh tikah an nunnak I bawi bik an chiahmi kha rumnak le nuamhnak, harnak le hremnak nih a hrawk kho lo ti kan hmuh khawh.
  3. Rumnak le hnangamnak nih Pathian a philhter hna lo. Zeitluk in an min a than le siangpahrang inn I an um zongah an biakmi Jehovah Pathian lawnglawng kha an biak ko.

An bawi a simi pa bia kha an ngaih. Kan nih cu Jehovah Pathian fale kan si caah nan misur zu thawthaw hna hi kan ding lai lo an ti. Kan biakmi Pathian nih a kan sianh lo an ti.

  • Zeitluk ttih a nungmi mei phu chung I an paih hna zongah Jehovah Pathian lawnglawng kha bawi bik a si an ti peng ko. Kan thih zongah kan thi ko lai, kan Pathian nih a kan khamh khawh ko. Sihmanhsehlaw khamh zong a kan khamh ko hnga i khamh lo zongin a va kan um ko hnga. A kan khamh zong a kan khamh lo zongah Nebuzkhanezzer siangpahrang cu kan bia kho lo i zeizong vialte sertu Isreal Pathian hmai dah ti lo pathian dang hna hmai ahcun kan kun lai lo e an ti.

Biadonghnak

Cucaah nihin ah chim ka duh bikmi te cu kan nunnak ah Jesuh cu Bawi a si ti ko hna u sih. Ṭih bikmi te hi kan ngei cio tawn. Duh bikmi te hi kan ngei cio tawn. Biapi bik ah chiahmi te hi a um ṭheuo tawn. Zeidang vialte nakin Jesuh hi biapi bik le bawi bik ah chia ko hna u sih! Cu Jesuh bawi bik i chiah cu zeidah a si. A duhmi tuah le a duh lomi tuah lo kha a si. Jesuh nih a pa nih a fialmi rian kha thih tiangin toidornak he a zulh bantuk in kan mah har lai le thangchiat hmual pho lai kha ruat lo tein Pathian nih si hna she, tuah hna seh ti a kan duhmi kha biapi bik ah chia in kan nun hmang hna u sih. Cucu kan nun ah Jesuh bawi ah kan chiah cu a si ko. Kanmah pumpak duhnak le ttihnak nih kan nun hruaiter loin Pathian duhnak le Jesuh tu hi kan nun hruaiter ve hna u sih. Jesuh cu Bawi a si! Pathian nih a profet hmang in a chimmi cu mi vialte nih Keimah cu Pathian a si tiah an ka ti. Ka sinah an ra lai I na hmai ah zumh awk thlak tein kan um lai tiah bia an i kam lai, tiah ka ti tiah Isaiah 45:23 chungah kan hmuh. Kan nun ah Jesuh cu Bawi a si ti ve u sih law na sinah zumh awk tlak tein kan um lai tiah bia I kam ve tuah hna u sih!

Nan zate Pathian nih thluachuah in pe ko hna seh!

A rian thiang ah,

John Ṭha Cung

Church Pastor

TCBC, Skien