Jesuh cu Bawi a si!

Filipi 2:8-11

Biahmaiṭhi

Filipi 2:11 chungah Pathian kan Pa sunparnak caah cun lei vialte nih Jesuh cu Bawipa a si, an ti lai tiah a ti. Hi cathiang hi mithiang Paul nih Filipi zumtu hna sinah a kuatmi hna a si. Hi sermon tawite ah hin Jesuh cu Bawi a sinak a ruang pahnih rak langhter khawh kan I zuam lai. A donghnak ah cu Jesuh nun pahnih kan nun ah kan langhter khawh ve ahcun midang nih kan nun an hmuh nak thawngin Jesuh cu Bawi a si tiah an ti khawh ve lai ti hi kan bia donghnak a si te lai.

Jesuh cu mi toi ah a dor i Pathian nih a cawisan

Jesuh cu midang sinah a toidor caah Pathian nih a cawisan ti kha a hme 8 ah kan hmuh khawh. Minung tampi hi Pathian hmai ah kan nun ṭhumh cu kan i tim ko nain kan minung hawi sinah kan i toidor kho tawn lo. Mark 10:43-44 chungah Jesuh nih, “Mi ngan si a duhmi nih cun nan sin um a si awk a si. Bawi cem si a duhmi cu nan dihlak sal a si awk a si,“ tiah a ti. Joseph le David nunnak kan zoh tik zongah cawisan an si hlan nunnak hi harnak tampi a um ti kan hmuh khawh. Jesuh ṭhiamṭhiam nih Vancung i ka rung ṭum cu keimah duhnak tuah awk ah si lo in a ka thlahtu ka Pa duhnak tuah awk ah khan a si deuh, a ti (John 6:38). Cucu a Pa duhnak cu mi vialte nih ca I a nunnak hman/pek kha a si ko. Zeitin dah a toidor ti ahcun Sal sinak kha a lak I a pa duhnak kha a tlinter ti kan hmuh. Rom 12:16 zongah Pakhat le pakhat nan zawn i ruat dih u. Lung puam in um hlah u, rian hme tete ṭuan duhnak lungthin kha ngei u. Ka fim tiah va ruat hlah u! tiah a ti. Jesuh nih  fialtu a Pa duhnak kha midang hawi sinah toidornak in a langhter ti kha kan hmuh khawh.

Jesuh nih a Pa fialmi rian kha toidornak in a zulh. Cu toidornak cu ho sin ah dah a langhter ti ahcun minung hawi sinah a langhter. Cu bantuk in kan nih vialte zong nih Pathian a nawl kan ngaihnak cu toidornak in kan minung hawi sinah kan langhter ve awk a si. Pathian kan ṭihnak cu zumh awk tlakmi sinak in kan minung hawi sinah kan langhter ve awk a si tihi thawngṭha nih a kan fialmi cu a si. Pathian hmai ah I tangdor ngai ko ṭung I midang hawi sinah i toidor khawh lo kha Jesuh nun a si lo. Hihi zumtu tampi kan nun ah a um ṭheo tawn caah kan nun ah midang nih Jesuh cu Bawi a si an ti khawh tawn lonak a si.

Filipi 2:6-8 tiang kan rel a si ahcun, Pathian tluk a sinak kha a kal tak I sal sinak tu kha a lak. Mi toi ah a dor I nawl ngeihnak lam kha thih tiangin a zulh.. a ti. Zumtu tampi hi Pathian tluk si kha kan kal tak kho tawn lo. Pathian tluk sinak kal tak cu zeidah a si. Sualnak zeihmanh a ngei lomi Jesuh sual an phawtnak le vailam cung tiang thihnak an phakter nak kha a chim duhmi a si. Mitampi hi na sual, na palh tihi kan celh lo. Jesuh cu sual an phawtnak vialte kha biaceihtu bawi nih na let hna lai lo maw tiah a ti tikah Jesuh cu dai tein a um ko. Ka khat hmanh a let hna lo. Kan nih cu si usihlaw biatampi kan chim men hnga ka ti. Zeiruangah? Kan nih cu midang tei duhnak lungput ṭha lo kan ngei. Kanmah dinnak/hmannak langhter duhnak ci kan i pawi peng. Cucaah Pathian nih sunparnak a hmuh khawh tawn lonak a si.

Kan I toidornak hmun le zawn hi kan minung hawi sinah a si i cawisangtu hi Pathian a si ti hi philh hna hlah u sih! Filipi 2:3 ahcun khat le khat i entainak le pumpak thangṭhat kawlnak kha nan lakah umter hlah u. Toidornak lungthin tu kha ngei cio u, a ti. A hme 8 kan rel a si ahcun mi toi ah a dor I nawl ngaihnak lam kha thih tiang in a zulh. Hi ruang ah hin cung lei a sannak bik hmun ah khin Pathian nih a cawi I min cungnung bik a peknak cu a si, tiah a ti. Pathian ka ṭih ko kan ti i midang cung ah kan i tangdor khawh lo ahcun kan nun ah Pathian sunparnak a lang kho lai lo. Zeicah? Kan I toidor ding cu kan minung hawi sinah a si. Midang cungah a toidor mi kha Pathian nih a cawi hna. Khat le khat I entainak le pumpak thangṭhat kawlnak vialte cu hlaw in toidornak he nawl ngaihnak lam kha thih tiang zulh khawh I zuam ko hna u sih.  

Zeitin dah Jesuh cu Bawi a si an ti?

Sal sinak tu kha I lak in mi toi ah a dor I nawl ngaihnak lam kha thih tiangin a zulh caah Jesuh cu Bawi a si an tinak cu a si. Zeitindah cu sal I a cangmi pa cu Bawi a si an ti khawh? Nawl ngaihnak lam kha thih tiangin a zulh caah a si ko.  Nawl ngaihnak lam kha thih tiangin rak zul hlah sehlaw Jesuh cu Bawi a si tiah an ti hnga lo. Zeicah? Thihnak in thawhter ṭhan a sinak in Bawi a sinak cu pek ṭhan a si. Thawhṭhannak in upatnak cu pek ṭhan a si. Cu nih a langhter mi cu cawisan, upat pek caan cu minung sinak a dih dongh hnu ah a si, ti hi a si. Hi vawlei le kan minung sinak vialte a dih dongh tiangin kan i toidor lo le kan i ṭhumh khawh lo ahcun Pathian sinin siseh, minung hawi sinin siseh upatnak le sunparnak kan hmu kho lai lo.

Jesuh nih hitihin a Pa sinah thla a cam, Na fapa nih sunparnak kan pek ve nak hnga, na fapa cu sunparnak ka pe ko. Vawlei ah na sunparnak ka langhter cang, na ka fialmi rian cu ka lim cang. Cucaah Ka Pa, vawlei ser hlan i nangmah sin i ka rak ngeihmi sunparnak kha, atu ah hin na hmaika ah sunparnak ka pe tuah (John 17:1, 4-5). Hihi an rawi lai, an thah lai ah a si. Jesuh nih a caan a dih deng cang ti a theih tikah hitihin thla a camnak a si. Jesuh nih thla a cam bantuk in vailam cung thihnak hnu ah Pathian nih Jesuh cun min vialte lak I min cungnung bik kha a pek.

Nu le pa, u le nau hna, minung tampi hi kan nun chungah rian lim kan duh tawn. Kan nun chung te ah upat kan duh tawn. Kan nun chungah kan palh lonak kha langhter tak kan duh tawn. Cucu thih tiang nawl ngaihnak lam zulh lo a si. Thih tiang toidornak lam zulh lo a si. Pumpak thangṭhatnak kawl a si. Hi ruangah midang nih kan nun ah Jesuh cu Bawi a si ti an hmuh khawh tawn lonak a si. Khrih min upat, sunparnak caah – na palh ti hi ṭih hna hlah u sih, thangchiat hi ṭih hna hlah u sih, thih hi ṭih hna hlah u sih! Kan nun lio te ah thil hman langhter ta ning ti hrimhrim hlah. A caan a phak tikah phuan caan a phan te lai. Cucu kan Pa Pathian rian a si. Zeicah cawisangtu cu Amah a si.

Bia donghnak

Vailam tahnak cungah cun Jesuh, Judah siangpahrang tiah an bia-eng in min an pek nain a thawh ṭhan hnu ah cun Jesuh cu Bawi a si tiah an ti ṭhan. Na nunnak ah harnak le namnehnak tampi na ton zongah toidor tein ing ko law, Pathian duhnak tu kha zulh khawh I zuam ko. Cu harnak le namnehnak a dih tikah Jesuh cu Bawi a si, ti kha na nunnak in an hngalh khawh lai. Jesuh cu sal sinak in min upatnak min cungnung bik pek a si bantukin toidornak he Jesuh keneh cu zul ve hna u sih! Cu tikah kan Pa sunparnak caah lei vialte nih Jesuh cu Bawi a si! an ti lai.   

A rian thiang ah,

John Ṭha Cung

Church Pastor

TCBC, Skien