Khrih Jesuh Chungah Pathian Daihnak

Filipi 4:6-7; 1Peter 5:7

Dawtmi TCBC khrihfabu vialte le hi live a rak zohtu hawi dawt nan zate Pathian minin nan kut kan tlaih hna.
Keimah cu TCBC church pastor John Ṭha Cung ka si. Nihin vawlei pumpi Coronavirus zawtnak rai harnak ruangah khrihfabu tampi pum kho lo in kan um cio bantukin TCBC zong tuzarh hi biakinn ah I pum kho loin kan umnak a zarh hnihnak a si cang. Biakinn ah pumhnak kan tuah khawh lo caah tuzarh cu Cikcin thlacamnak program in TCBC caan kan hmang. Norway caan zing nazi 09:00 kan thok I zan nazin 08:00 ah kan dih te lai. Nihin hi Christian Council of Norway (Norway ram khrihfa vialte kan I hawikawmhnak bu) zong nih nihin hi vawlei pi le Norway ram caah thlacam ni (National Prayer Day) ah a thanh. Kan hnu zarh ah I pum kho hlah hmanh u sih law thawhlawm, cheuhra cheukhat in Pathian nan biaknak le thlacamnak kan hmuh caah TCBC khrifabu ai-awh in lawmhnak tampi kan ngei I Pathian sunparnak caah si ko she tihi khrihfabu kan thlacamnak a si. Tuzarh cu thlacamnak program pin ah facebook chung zongin keimah le kan pastor a simi saya Duh Tawng Lian nih sermon tawi kan rak chim lai. Keimah nih thlacamnak ka rak ngeih te lai.

Nihin chun ah Pathian bia in thazang la ṭi dingin Baibal cacaang hmun 4 ah ka rak I thim. Cu hna cu Psalm 145:18-19; 146:5; 1Peter 5:7-11; Filipi 4:6-7 hna hi an si. Nihin ah Coronavirus ruangah pumpak chungkhar, khrihfabu kip kan lungre a thei cio hna. Ngandamnak kong ah kan lungre a thei. Vawlei pi sipuaizi tiang a hnursuan ngai cang caah pawcawmnak kong ah lungre a thei zong kan um pah hna lai dah. A tawi fiannak in cun nihin hi kan harnak caan taktak a si ko. Phungtlukbia 24:6 chungah zeicahtiah ral cu ttha tein khuakhannak thawngin tei a si i saupi timhtuahnak theitlai cu teinak a si, a ti. A hme 10 chungah cun harnak caan i na der a si ahcun na der taktak a si, tiah a ti fawn. Hi lio caan ah kan der ahcun kan der taktak a si hnga. Sihmanhsehlaw Pathian bia nih teinak lam a um ko ti a kan cawnpiak. Cucu ṭha te i timhnak cozah, hruaitu hna nih, ngandamnak hna nih hrial ding, tuah ding an timi kha fel te i zulhnak le timhtuahnak ṭha hmangin Coronavirus zawtnak chung in Pathian nih a kan khamh lai nak kha Pathian bia nih a kan chimhmi a si. Cuvevantukin Saupi timhtuahnak theitlai cu teinak a si a tibantuk in a luanciami caan chung I kan thlacamnak kan zumhnak le Pathian kan rak i bochannak vialte kha nihin ah langhter caan a si cang. Kan zumhnak langhter caan a si. Hi bantuk harnak caan ah kan zumhnak a der ahcun, kan zorchuk sual ahcun der taktak kan si ti kha Pathian bia nih a kan chimhmi a si. Nihin ah ṭhawng chin tu in zumtu kan sinak le Pathian fa kan sinak kha a langh caan a si. Rev. Za Thawng Cin chimmi nih thazang a ka pek tuk. Harnak nih ṭhawnnak a chuahter, a kan pek a ti. Nihin Coronavirus harnak caan chungah zumtu hna ṭhawng chin ko hna u sih!

Psalm fung 145 caang 14 le caang 18 nak harnak a ingmi kha a bawmh hna i ṭhumhnak a tongmi kha a cawi hna. Lungtak in Amah a autu vialte hna cu an pawng te khan a um hnawh hna, a ti. Nihin harnak chung Pathian nih a kan umpi ko ti hi philh hna hlah u sih. A ṭum taktakmi vawlei pi sipuaizi le pumpak kanmah vialte zong hi Pathian nih a kan philh lo I a tunmer ṭhan hrimhrim lai I a kan cawi ṭhan hrimhrim lai tihi Pathian bia a si. Ps. 91:15-16 chungah an ka auh tikah ka leh hna lai I harnak an in tikah ka umpi han lai. Ka chuah han lai I ka upat hna lai. Laksawng ah nun sau ka pek hna lai i ka kahmah hrimhrim hna lai, a ti. Pathian nih hi harnak chungah kan pawngte a um ko i kan khamh hrimhrim hna lai tiah bia a kan kamh. Cucaah Psalm 146:5 chungah cun Jakob Pathian kha bawmtu ah a serhmi cu milunglawm an si, Bawipa a Pathian kha aa hngatchanmi cu milunglawm an si a tinak cu a si. Zumtu hi mi milunglawm, mi vanṭha kan si hi philh hlah u sih!

1Peter 5 chung kan zoh a si zongah Pathian nih lungretheihnak kong he pehtlai in Pathian bia nih hitihin a kan cawnpiak. Amah nih an zohkhenh hna caah nan lungretheihnak vialte kha amah cungah chia dih ko u, a ti (a hme 7). Amah nih an zohkhenh ko hna caah a ti. Amah nih a kan zohkhenh ko. Amah planning chungah kan kal ko. Cucaah Bawipa zeizong vialte, zeibantuk thil ka ton hmanh ah na kut chungah, nangmah chungah kan ap dih I nangmah duhning in si ko hna seh tiah thlacam cio hna u sih. Minung nih harnak an ti men lai, Pathian nih kan caah a ṭha bik a timi a si ko tihi cohlan khawh I zuam hna u sih. Caan tampi ahcun Pathian nih phun tampi in thazang a kan pek. Lam tampi in fim a kan chimh, a kan cawnpiak tawn. Cucaah hi harnak caan ah zei bantuk thazang thar le fimnak thar, ṭhawnnak thar dah kan hmuh khawh cio lai tihi kan thlacamnak si cio ko seh! A hme 10 tiang kan peh ahcun fimhring tein um u, ralring tein um u. Nan ral khuachia cu, seh awk kawl ah chiandeih bangin a vak cuahmah ko, a ti. Hi harnak chungah sehtan nih sehmi, a der chinmi kan si lo ding a biapi tuk. Sihmanhsehlaw caan tlampal nan in hnu ah velngeihnak in a khatmi Pathian nih fehnak le thazang le a fekmi hram bunhnak an pek hna lai, a ti. Amah nih kan zohkhenh ko caah zeizong vialte cu amah cungah chia ko hna u sih. Amah nih a kan khamh lai I inkhawhnak thazang le fimnak a kan pek ko lai. Hi zawtnak hi a rauh hlan ah a dihter zau hrimrhim lai. Amah kut chungah kan um I a vel chungah khua kan sa tihi thei bu tein zumh fehnak le thlacamnak he caan hman khawh I zuam cio hna u sih!

Filipi zumtu hna sinah Paul nih thazang a pekmi hna cu zeithil kong hmanh ah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u. cun Pathian daihnak, minung hngalnak a lonhtu nih cun, Khrih Jesuh chungah nan lungthin le nan ruahnak cu him tein a chiah lai, a ti. Dawtmi zumtu vialte Pathian bia nih a ti bantuk in hi Coronaviras zawtnak kong ah siseh, zeidang thil kong zongah lungrethei tukin um hna hlah u sih! Pathian sin tu ah lawmhnak le zumhnak he thlacam u sih. Pathian sinin a rami daihnak nih kan lungthin le ruahnak cu Jesuh chungah, him tein chia ko seh! Pathian sinin a rami daihnak nih cun minung ṭihphannak le hngalhmi vialte kha a lonh dih, a tei dih khawh ko. Khrih sal pa Paul nih Khrih chung I nan nunnak nih khan an ṭhawnter hna maw? A dawtnak nih khan nan hna an ngamter han maw? a ti bantuk in Khrih Jesuh chungah a ummi, minung hngalhnak le thinphannak vialte a lonh dih tu, Pathian daihnak cu nan zate cungah um ko seh! Amen!!

A rianthiang ah,

John Ṭha Cung

Pastor

TCBC, Skien