Kan nunnak ah timhtuahnak a biapit ning tuanbia tawi (Hard Work vs Smart Work)

Mino le Upa Kan I Dannak

Khua pakhat ah hin kum fate thingtan zuamnak an tuah tawn ti a si. Zuamnak phung an sermi cu thing tam deuh a hau kho i tam deuh a tan khomi paoh kha teitu an si.

Kum khat zuamnak ahcun a donghnak final ah a zuam ding pahnih lawng an tang cang. Pakhat pa cu mino a si i a dang pakhat cu tar upa lei a si. Kan theih cio bang mino cu thazang le ruahnak a ṭhawngmi kan si. Hmanhseh, hmuh tonmi tam deuh a ngeihmi dah ti lo upa, tar pa hi cu thazang tlawm deuh mi a si.

Mino deuh pa cu aa biatak ngaingai. Donghnak a si cang caah ka tha dih umnak in, din lo bak in nikhat cung cu ka si khawh chungin ka zuam lai i mah tarpa hi cu ka tei ko lai tiah amah le amah aa zum ngaingai. Cuticun, ram lak ah cun an kal i zuamnak cun an vun thok. Khatlei khatlei varal veve ah thing cu an tan. Mino tlangval pa a haunak khat lei ral ah tarpa cu duhsah nawn te khin a rak tan cuahmah ve. An thing hau thawng, a tluk thawng le an tan thawng cu pakhat le pakhat an i thei dih.

Cutikah mino pa nih a tuakmi cu tarpa a dinh caan kha a si. A ruahmi cu a dinh kar ah hin din lo in ka ṭuan lai i ka tei hrimhrim lai ti a si. Cucaah, tarpa a ṭuan thawng a theih lo caan ko ah khan heh tiah a hnek i din lo bakin a ṭuan.

A donghnak teitu thawng thanh lai cu a si i mino pa cu i zum ngai khin an thawngthanh dingmi cu a hngak ko. Tarpa cu zoh ah a ba ngai… zeicahtiah anih cu thazang tlawm deuhmi a si caah. Mino deuh pa nih cun ka tei ko lai ti hi aa zumh ngaingai. Teitu an vun thanh taktak cu aa zum tukmi le aa zuam tukmi mino pa cu a sung diam i thazang tlawm deuh tar pa nih a tei ai…

Tarpa lei ah cun a mer i, “Nazi pakhat dan paoh ah na din. Na dinh chung paoh hi kei din lo tein ka ṭuan. Zeitin dah na ka tei khawh? Zeitin dah na ka tei ning a si?” tiah tarpa cu a va hal.

Tarpa nih a lehmi cu, “A si. Nazi pakhat dan ah ka din lengmang ko. Nain, ka dinh ah khan ka rak i din sawhsawh lo. Ka hreitlung kha har ten ka tat lengmang hna i ka tha ka hrim i timhtuahnak ṭha tein ka ngei ṭhan lengmang,” tiah a leh.

Tuanbia nih a kan cawnpiakmi:

Kan nunnak ah hin kan i hnawh tuk tawn. Sihmanhsehlaw, ka i dinh tak i thazang kan lak tak a herh than lengmang. Timhtuahnak ṭha ngeih hi teinak lam ṭha bik a si kha fiang ten a kan cawnpiak.

Baibal caang thim: Phungtlukbia 6:6-8