Zumtu nih chim lo ding bia pa 3

Zumtu nih chim lo ding bia pa 3

Khrihfami nih kan chim tawnmi, asiloah, kan chim ngaimi ka siarem lomi thlawmpal hun langhter ka duh. Hihi keimah zumhnak le hmuh ning sawhsaw a si. Zumhnak ah cun dawnkhaan tu an si hrimhrim lai lo. Khamhnak kong tiang a va i peh tlaimi cu an si fawn lai lo nain zumtu pakhat le pakaht kan i pehtlaihnak ah ruah awk tlak an si ko tiah ka ruah caah ka hun langhter. Zumtu nih chim lo ding bia 3 hna cu:

  1. Thla ka rak in cam piak lengmang lai

Nan ka theih thiam sual lo ding kan nawl hna. Thlacam hi a biapi taktak. Pakhat le pakhat thla i campiak zong a biapi tuk ve. Nain lengmangtimi biafang kan hmanmi te hi i ralring deuh u sih ti ka duh bia a si. Kan tuah khawh lo dingmi tiang, fawi tuk in luhmuhzibantuk in kan chim lo ding a biapi ngaingai. Bawipa nan Pathian min cu ningcang loin hmang hlah u tiah nawlbia 10 chung ah a kan cawnpiak (Exo. 20:7). Thla ka rak in cam piak ve lai ti a za ko. Lengmang lai timi biafang hi hman lem ding a si lo.Kan campiak zungzal kho fawn hna lo!

  1. Khamh na si cang maw? Na piangthar cang maw? 

Pathian thawngtha kan chimnak ah kan chim tawnmi a si. Khamh na si cang maw? Na fiang cang maw timi biahalnak hi zum lotu hna sin zongah kan chim tawn i zumtu lak zong ah kan chim tawnmi a si. Jesuh bal nih cun pehtlaihnak le an ca i riantuan piak tu in thawngtha a rak chim ti kha kan hmuh khawh. Pathian bia kan chim tikah, Pathian dawtnak kong kan chim tikah mi dang caah theih a nuam lomi biahalnak le biafang pawl cu kan hrial khawh ah a ttha. Zumh le zumh lo in hneksak hmasa ding an si lo. Pathian dawtnak tu in an nun thlen i zuam ding a si ko.

  1. Na thinphang hlah, Pathian nih an tinh piakmi a um ko.

Chim lo ding bak a si ka tinak a si lo. A caan le a zawn te kan tuak pah a herh ti duhnak a si. Hi bia hi khrihfa pakhat dirhmun in a dawh ngaimi le a hman ngaimi a lo. Pathian nih kan caah a kan tinhpiakmi le a kan timhpiakmi a um ti hi al awk a um lo. Cucu harnak caan ah theih kan duh ngaimi bia a si fawn. Hi zawnah chim ka duh mi cu a fapa hniang nih ruah lo tuk in a thih takmi nu pa kha nan ngaih chia hlah u, Pathian nih an tinh piakmi hna le an timh piakmi hna a um ruangah a si ti nih cun a hnem kho hna lai lo. Ngaihchiatnak ngan pi kan ton lio caan ah hin aruang hi biapi a rak si lem lo. Hnemhnak tu kha kan herh deuhmi cu  asi ko. Cucaah, kha caah a si tiin kan hnem kho lem hna lai lo. An ngaihchiatnak tu kha lungthin tak tein hrawm pi i kan bawmh khawhmi hna bawmh ding kha a biapi deuh.

by
John Ṭha Cung