Sermon: Herod Nih Jesuh Huham A Langhter

HEROD NIH JESUH HUHAM A LANGHTER

(Mat 2:16)

Bawi Dua

Jesuh hi Herod siangpahrang a si lioah a chuak ti cu Baibal nih fiangte in a chim. Herod hi BC kum 4 ah a thi ti hi tuanbia ṭialtu tam deuh nih an zumhmi a si. Herod nih kum 2 tang ngakchia a thahter hna caah Jesuh hi Herod thih hlan kum 2 hrawng ah a chuak cang ti khawh a si. Cucaah Jesuh a chuah hi BC kum 6 (asiloah kum 7) a si lai tiah Baibal thiamsang tampi nih an zumh.

Herod hi khuaruahhar minung a si. Minung lungthin a keng rua lo ti awk in a um. Zeicahtiah a rianṭuan hawi, biaceihzung rianṭuantu 300 a thah hna. A nupi Mariamne le a nupi nu Alexandra a thah hna. Cun, a fapa upa bik Antipater le a naule pahnih: Alexander le Aristobulus a thah rih hna. Ka ṭhutdan an ka chuh kho men tiah a ruahmi vialte cu a thah lengmang ko hna. Cubantuk lungput a ngeimi, Herod, nih “Judah siangpahrang a si laimi Jesuh” thah a duh cu khuaruahhar thil a si lo. Thah timh loin daite in rak um sehlaw cucu khuaruahhar deuhmi a si hnga. Herod nih Jesuh thah a duh lai ning hi cu a hiar bakin a hiar lai. A kut hi a thak bakin a thak lai. A thinlung cu a tlok bak in a tlok lai. Cu lioah Herod nih hin Jesuh hi rak hmuh sehlaw zeitin ko dik a um hnga? Amah kut le vainam bakin a can in can dih a duh men lai. Jesuh lawng siloin a nu le pa hmanh thah chih a duh men hna hnga.

Sihmanhsehlaw mi thah aa fawih tukmi, Jesuh thah a hiar bakin a hiarmi pa, Herod nih Jesuh cu a that kho lo. Jesuh a hmuh lo le a that khawh lo tikah i lungsak ko loin Bethlehem khua le a pawngkam khua i ngakchia kum 2 tang tiang a thahter dih hna. Cu nih cun Herod nih zeitluk in dah Jesuh hi thah a duh timi a langhter. Zeitlukin that duh in kawl len hmanhsehlaw a hmu kho lo i a that kho lo. A ralkap tampi thil ti khawhnak cu pakpalawng ah an cang. Pathian nih Jesuh that kho lo dingin lam a rak sial kha Herod nih a hngal kho lo. Lungthin chiakha tukmi nih Pathian lungthin hmuh khawh a har hrim ko. Lungthin ṭhat lo tuk nih Pathian khuakhan hngalh khawh a rak si hrim loHerod aa chuah sual.

Herod nih an fale rak a thah piakmi hna chungkhar kong ruah ahcun ngaihchia tuk a si. Cuti lei in na ruah ahcun Herod nih na thin an hunter tuk lai. Herod cu mi thattu, lainawng, ngaihchiatnak mi a phortu, dawtnak le zawnruahnak lungthin a ngei bak lomi, mah zawn lawng aa ruatmi, tiah a chiatnak lei lawngin na hmuh ko lai.

Asinain zeithil poh hi a chiatnak lei lawngin tuak ding le ruat ding an si lo. Chiatnak lakah zei ṭhatnak dah a um ti hi ruah chih a herh tawn. Zeiruangahdah hi tluk a chiakhami Herod chan ah hin Pathian nih Jesuh hi a chuahter hnga? Zeiruangahdah Pathian nih kum 2 tang ngakchia hna kha Herod nih thah dingin a onh ko hnga? An fale thah piak asimi hna chungkhar i an ngaihchiat lainak hi Pathian nih a ruat hnga lo maw? Hi tluk zatlaknak le ngaihchiatnak a si dingmi thil hi Pathian nih zeiruangahdah a tlunter hnga?

Hi vialte te biahalnak hi ka ruat lengmang hnu ah caṭialtu ka lungthin khuaruahnak ah a hung fiangmi cu mihring fa cu minung nih that ko hmanh hna sehlaw Pathian Fapa Jesuh (mihring fa a si lomi) cu minung nih an that kho lo ti hi a si. Jesuh hi a chuah lio hrim in that khawh a si lomi Pathian Fapa a sinak Pathian nih a rak langhter chung cang.

Jesuh hi that khawh a si lomi Pathian Fapa a sinak huham cu Herod nih a langhter. Herod thinphannak le awlokchonnak vialte nih Jesuh hi mi sawhsawh a si hrimhrim lo, Pathian Fapa a si, ti hi fiangte in an langhter. Herod nih hin Jesuh hi mihring fa sawhsawh a si lonak a langhter ngaingai.

Dohtu le raltu ah kan ruah tawnmi hna hi kan huham a langhtertu an rak si tawn. A kan huatu kan timi hna hi kan Khrihfa nun zia dawh langhtertu ah Pathian nih a hmanmi hna an rak si tawn.