Tuanbia: Alexender the Great Thih lai Bia Rovuih 3

Alexender the Great Thih lai Bia Rovuih 3

Ram tampi a tei hnu, a lak hnu ah, Alexender cu a ralkap ruun hna he inn lei tlun an i tim. Inn an tlun pah ah, lampi ah fak ngai in a zaw. A zawtnak a zual tuk caah damh khawh ding a si ti lo. Ihkhun cungah thih bawh in a ril. Cu ti a ih khun cung i a rilh lioah cun ngaihchia ngai in khua zaza a ruat. “Ka rumnak vialte, ka ral kap thazang vialte le ka vainam ṭhaṭha hna hi pakpalawng ah pei an si dih cang ko lai hi… tiah lungzur ngai in khua cu a ruat lengmang. Hmanhseh, chanh awk a ṭha ti lo. Thlopbul len zawngah pakpalawng menmen ah a cang. San a tlai ti lo. A ih khun cungah cun daang ṭemṭuam piin a ril ko. A miṭhi le a milang pawl zong kan bawipa/sayapa zeitik dah a thaw a dih lai ti lawng an hngak cang.

Cu lioah cun ruah lo piin a kut tang ralbawi zik pakhat a vun auh. Ral bawi pa sinah cun hi ti hin a ti. “Kei cu a rauh hlan ah hi vawlei nunnak hi ka chuah tak cang lai. Cu caah cun bia pathum te cah taak kan duh. Cucu pel lo tein ka thih tikah nan rak tuah te hrimhrim lai,” tiah a ti.

Cu bia a chim dih le cangka cun a kuttang ral bawipa he an pahnih in an ngaih a chiatuk i an biangki no cungah an mitthli cu kham awk ṭha loin ṭhal ruah bang a thla thlurhmarh. A kut tang pa nih, “Aw…ka bawipa…biacah awk na ngeih mi cu chim ko. Kan rak zulh lai. Kan rak tuah hrimhrim lai,” tiah Alexender cu bia a kamh.

Alexender nih cun biacah kan duh mi a pakhatnakcu: “Ka sibawi lawnglawng nih ka ruak kuang hi rak phor hna seh,”tiah a ti.

Cun tlawmpal a dinh hnuah a bia cu a vun peh ṭhan. A pahnihnakcu: “Ka ruak kuang thlan chung phum ding in nan phorh tikah, ka thlan lam vialte kha sui le ngun, lung man sungsung ka ngeih mi vialte khan nan rak ṭamh dih lai,” tiah a ti.

Cu vial a chim ah cun a ba ngaingai cang. Minute pakhat hrawng a vun din ta. Cu hnuah a pathumnaka biacah cu a chimh ṭhan. “Ka kut hnih tein ka ruak kung lengah nan rak chuahter lai I nan rak thuiter lengmang lai,”tiah a ti.

A ih khun pawngah a ṭhu mi a biacah a ngaitu vialte cu a khuaruah a har tuk hrinhran. Nain, zeibia hmanh an hal ngam lo. Cu ti cun awlawkchong van sang in an um. Zei ti tuah awk an hngal lo. Cu lioah cun a mah he aa kawm ngaimi pakhat nih Alexender kut cu a vun lak i a hnamh. A thin hmaka te a tonghter. Cun Alexender cu ti hin bia a hal.

Ka bawipa, biaro na kan vuih mi cu kan zapi tein kan tuah hrimhrim lai tiah bia kan in kamh. Natein, zeiruang ah dah mah bantuk khuaruah har biaro hi nan kan vuih, timi hi zangfah tein kan fianh ta law kan i lawm ko hnga ee, tiah a ti.

Alexender cu a tha a dih ngaingai cang. Nain, a thawpi Humm…tiah a vun chuah i mah ti hin a ti hna. Vawleipi nih hin a tu ka hngalh mi thil hi hngal camcin ve hna seh ti ka duh caah mah biaro pathum te hi ka vuih hnanak a ruang hi a si.

A pakhatnak bia kan cah mi hna sibawi te lawng nih ka ruak kuang hi rak phor hna seh ka ti mi a sullam le a ruang cu mah hihi a si. Vawleicung sibawi paohpaoh nih hin minung hi an damh kho taktak lo… timi hi mi vialte nih thei hnaseh ti ka duh caah a si. Sibawi zong nih hin mi nung thihnak chung in a um mi hna hi an chanh kho taktak ve hna lo. Chanh khawhnak thazang zong an rak ngei ve taktak hlei lo. Cu caah cun ahohmanh nih nunnak hi rak daw cio u law, rak sunhsak cio u, ti ka duh caah a si, tiah a ti hna.

A pahnihnak ka biacah mi ka thlankal nak lam sui le ngun in siseh, lung man sung hna rak theh viar uh tiah ka ti duhnak a sullam cu…ka nunnak caan vialte kha hakkau ngai in rumnak ka rak kawl. Nain, ka rumnak cu a tu ah cun ken awk a ṭha ti lo. Pakpalawng men an si. Cu caah cun mivialte nih theih hnaseh ti ka duh mi cu, rumnak kawl hi caan hloh, caan pamh menmen a si. A dongnak ah cun ken awk nih le an ṭhat ti lo tikah hlawnh awk thi le ri men ah an cang ko, timi hi vawlei pinih thei seh ti ka duh caah a si, tiah a ti.

A pathumnak bia kan cah mi hna kha ka kut a pahnih tein ka ruak kuang leng ah nan rak chuahter lai i nan rak thuiter lengmang lai tiah kan ti mi hna a sullam cu mah hihi a si. Vulei cungah hin tak lawng in ka rak ra, cun tak lawng ṭhiamṭhiam in ka kir ṭhan, timi hi mivialte nih thei hnaseh ti ka duh caah a si, tiah a ti hna.

Cun tlawm pal ah a mit duhsah tein aa chin i a thaw a dih ve.

Mah tuah bia in ka cawn mi khawhmi cu, “Na ngam a dam le dam lo cu nang mah kut chungah a um ko, ṭha tein i zoh khenh ko. Rumnak hi midang bawnhchanh nak caah ah hman lawngah hmual le sullam a ngei. Nangmah ca lawngah thil na tuah ah cun, na thih tikah na thih pi chih ve ko lai. Nain, midang caah na tuah a si ah cun, a nung zungzal ko lai,” ti hi a si.

By Chavy Ṭha Tin Kulh

Ref: Moral Stories