CHUNGLEI IN THLENMI KHRIHFA

CHUNGLEI IN THLENMI KHRIHFA

Baibal Cangthim: Rom 12:2

Mifim nih nun cu thlen dingah a si i, thlen cu ṭhan dingah a si (To live is to change, to change is to grow) an ti tawn. A dik tuk. Thlennak um loin ṭhanchonak a um kho lo. Thlen ding tampi kan ngei ko lai. Cu lakah thlen hmasa a herhmi cu “thinlung” a si. Kan tlangtar ah “chunglei in thlenmi Khrihfa” timi cu “thinlung thlen a si cangmi Khrihfa” ti duhnak a si.

Asiah, zeiruangahdah thlen ding tampi lakah thinlung hi thlen hma a herh? A ruang cu:

  • Lenglei lawng aa thleng i thinlung (chunglei) aa thleng ṭung lomi cu Jesuh Khrih nih a huat tukmi a si. Matt. 7:15 ah Jesuh nih “Nal profet kha i ralring hna u, nan sin an rat ah cun tuu bantukin an i umter, sihmanhsehlaw an chunglei cu cenghngia hrang an si” a ti. Lenglei lawng aa thleng i thinlung aa thleng ṭung lomi cu “nal profet bantuk an si” tinak a si. Matt. 23:28 ah Jesuh nih Phungbia cawnpiaktu saya hna le Farasimi hna cu “a lenglei cun mi ṭha ko nan lo, sihmanhsehlaw nan chung cu lih le sualnak in a khat” a ti hna. Thinlung aa thleng lomi cu “Farasi le phungbia cawnpiaktu saya hna bantuk an si” tinak a si.
  • Lenglei kan tuahmi vialte hi thinlung in a chuakmi an si. Jesuh nih “Mi cu chunglei in a chuakmi thil tu nih a thurter” (Mark 7:15) tiah a ti. Cucaah minung a thurtertu le a an sualnak a kan tuahtertu taktak cu “thinlung” hi a si ko. Thinlung nih ṭhatnak duh loin ṭhatnak tuah khawh a si lo.
  • Lungthin cu zeizong vialte nakin a zer bik (Jer. 17:9). A zer bikmi a si caah thlen a herh bikmi a si.
  • Kan lungthin cu theihnak (feeling) vialte an i funnak hmun a si. Phundang in kan chim ahcun, kan thinlung cu kan nunnak uktu, tummertu a si. Lunglawmhnak, ngaihchiatnak, thinhunnak, lungretheihnak, ṭihnak, thinphannak, duhnak, khuaruahnak, timi vialte “theihnak” (feeling) hna hi thinlung in a chuakmi lawngte an si. Cu thinlung chung i feeling hna cu lenglei mithmai, umtu ziaza, hoiherh ah a hung lang. Cucaah thinlung aa dawh lawngah ziaza le nunning aa dawh.

Pathian Caah Lungthin(Heart for God)

Pathian nih a kan hal bikmi le pek a duh bikmi cu kan thinlung (heart) hi a si. Pathian nih kan lungthin dihlak in dawt a duh (Deut. 6:5). Kan lungthin hi Pathian caah a si awk a si. Kan lungthin hi a khaankhaan in ṭhen sisehlaw Pathian caah zeikauhdah Pathian caah hmunhma a um hnga. Na lungthin ah Pathian nih hmunhma a ting ve hnga maw? Lungthin ṭha lo, thil ṭha lo vialte cu lungdang ngeih tak, mak, mertak law na lungthin cu Pathian pe law ukter peng ko. Mi lungthin a thleng kho bikmi cu “dawtnak” a si. Pathian dawtnak nih na lungthin an thlen i, an dawtu Pathian na lungthin a ngeih i a uk khawh ahcun “Chunglei in thlenmi Khrihfa” na si. Cucu Pathian nih a duhmi le a lawmhmi thil an si.

by Pastor Bawi Dua